Abubuwa 5 Da Ya Kamata Ku Sani Game da Tsarki

1. Tsarkin Allah yana da muhimmanci.

“Mai Tsarki, Mai Tsarki, Mai Tsarki Mai Runduna” (Isha. 6:3; duba kuma Ruya ta Yohanna 4:8). Waɗannan su ne kalmomin da aka bayyana a sama lokacin da aka kawo Ishaya gaban Ubangiji a kan kursiyinsa. Halittun sama suna tsaye cikin mamakin yanayin Allahntaka da tsarkin da ba za a iya kwatantawa ba. Idan muka haɗu da Mai Iko Dukka kuma muka gane Shi kamar yadda yake, muna amsawa ta hanya ɗaya. Lalacewarmu tana bayyana ta hanyar hasken da ya fi haske (Isha. 6:5) kuma mun gamsu da hukunci mai ban tsoro da tabbatacce akan zunubi. Duk da haka, abin mamaki, kuma tabbas, ceto mai ɗaukaka yana fitowa daga tsarkinsa (Isha. 6:6–7).

Sau da yawa, duk da haka, tsarkin Allah yana kama da ba shi da mahimmanci, batun da ba shi da sha’awa ko kaɗan. Lokacin da zunubi ya makantar da mu, tsarkinsa ya bayyana ba shi da damuwa. Duk da haka, Allah ya kasance mai tsarki, kuma dukkan ayyukansa sun dogara ne da tsarkinsa, gami da halitta, ceto, da hukunci. Ko an gane shi ko ba a gane shi ba, tsarkinsa yana da muhimmanci ga kowa domin zai shafi kowa, ko dai a cikin ramawar zunubi lokacin da Allah ya kawo hukunci, ko kuma cikin alherin cetonsa ta wurin Yesu Kiristi, “Mai Tsarki da Adalci” (Ayyukan Manzanni 3:14).

2. Tsarki yana da mahimmanci don ceto.

Muna buƙatar tsarki don tafiya tare da Allah da kuma shirya don hukuncinsa. Zunubinmu yana nufin ba za mu iya isa ga tsarki da kanmu ba. Amma akwai labari mai daɗi domin Allah yana son ya raba shi kuma yana aiki a cikinmu ta wurin Ruhunsa Mai Tsarki (Romawa 15:16). A lokaci guda, dole ne mu “yi ƙoƙari don zaman lafiya da kowa, da kuma rayuwan tsarki, wanda in ba tare da shi ba, ba wanda zai gan Ubangiji” (Ibran. 12:14). Wannan yana nufin inganta tsarkinmu. Allah yana ba da wannan kuma, amma dole ne mu nemi Allah ya yi wannan aikin a cikinmu. Dole ne mu yi nufin faranta masa rai, yayin da shi kaɗai ke ba da nufin da iko don yin hakan (Filibiyawa 2:12–13). Wannan ya ƙunshi furta zunubanmu, juya baya daga gare shi, da kuma bin hanyoyin adalcin Allah. Cikin kulawarsa ta Uba a gare mu, Allah ya yi nufin mutanensa su sami dangantaka ta kashin kansu da Shi, inda za mu iya zuwa gare Shi cikin yardar rai don duk abin da muke buƙata. Ko da yake sau da yawa muna kasa masa, muna iya ɗauka cewa zai kammala aikin da Ya fara (Filibiyawa 1:6).

3. Tsarki shine zuciyar ceto.

Tsarkakawar Allah tana da muhimmiyar rawa a cikin ceto, kodayake ana yawan yin watsi da wannan. A cikin Almasihu, tsarkin Allah yana nufin bayyana zunubanmu da ceto daga zunubi. Abu mafi mahimmanci, Kalmar Allah akai-akai tana tabbatar da cewa tsarkinsa yana tabbatar da ceton Kirista (Isha. 6:1-7; Zak. 3; Rom. 5:10).

An ƙara tabbatar mana cewa tsarkin Allah yana cikin zuciyar ceton Kirista ta hanyar labaran Littafi Mai Tsarki game da rayuwar Almasihu, mutuwarsa, tashinsa daga matattu, da kuma sabuwar haihuwa. Zabura 16:10 tana magana game da tsarkinsa a rayuwa da mutuwa: “Ba za ka… bari mai tsarkinka ya ga ruɓewa ba.” Tashinsa daga matattu “bisa ga Ruhun tsarki” ne (Romawa 1:4). An sake haifarmu ta wurin tanadin Ruhu Mai Tsarki da Allah ya yi mana (Yohanna 3:5–8). Tsarkakakkiyar Allah tana bayyana a cikin kowanne daga cikin waɗannan muhimman abubuwan—hakika a kowane lokaci—na cetonmu. Ta wurin alherin Allah a gare mu cikin Yesu Kiristi, za mu iya tunanin tsarkinsa a matsayin cetonmu

4. Tsarki ba ya nufi mutum ya rika ganin kansa ya fi sauran mutane tsarki ba.

Maganar Turanci “holier than thou” ana amfani da ita ne don bayyana mutum da yake nuna kamar ya fi makwabcinsa nagarta ko tsarki. Wannan ba shi ne tsarki ba; maimakon haka, ya saba wa tsarki. Tsarki a wurin mutum yana nufin nuna siffar Allah a rayuwarsa, Allah wanda, kamar yadda Yesu ya bayyana, mai tawali’u ke kuma mai sauki zuciya. (Matta 11:29). Almasihu, wanda yake cikakke a cikin tsarki, ya yardar kansa ya dauki kaskantar wuri, ha rya zama abin la’ana a kan giciye. Domin mu ne ya dauki kunyar zunubanmu. Bin koyarwarsa da aminci yana nufin ɗaukar matsayi mai ƙasƙanci, ba matsayi mai daukaka ba, a cikin dangantaka da wasu (Luka 14:10–11; 22:24–30; Yahaya 13:14–17; 1 Bitrus 5:6).

Halin ganin ka fi sauran mutane tsarki yana kama da adalcin kai. A cikin misalin Yesu game da Bafarisiye da mai karɓar haraji (Luka 18:9–14), Bafarisiyen mai adalci ya yi imani cewa yana kusa da Allah amma yana ɗaukar kansa a matsayin wanda ya fi maƙwabcinsa a ɗabi’a. Ya gode wa Allah cewa ba kamar mai karɓar haraji yake ba, amma mai karɓar haraji ne ya koma gida yana da adalci, bayan ya roƙi Allah ya yi masa rahama. Tsarki yana bayyana kansa ta hanyar halaye na ɗabi’a, amma kamar yadda Kristi yake misaltawa kuma ya koyar ne, koyaushe da tawali’u ba tare da alfahari na ruhaniya ba.

5. Tanadin Allah an tsara shi ne domin ya sa Kristoci su yi girma a cikin tsarki.

Tunda nufin Allah da aka bayyana shi ne ‘ya’yansa su siffanta Shi cikin tsarki, an tsara shi ne don ya samar mana da wannan kuma ya ba mu damar girma a ciki. A cikin ikonSa, Ya kawo mu ga bangaskiya ga Yesu Kiristi. A cikin ikonSa, Yana horonmu saboda zunubanmu domin mu yi tarayya cikin tsarkinsa Ko da yake yana da zafi a lokacin, yana haifar da girbin adalci (Ibran. 12:10–11). Yana ba da Ruhu Mai Tsarki, Littafi Mai Tsarki, da ikklisiya, wanda Ya kira mai tsarki, don ya tanadar da kuma koyar da hanyar tsarki. Allah ma ya tsara mako don ci gabanmu cikin tsarki: “Ku tuna da ranar Asabar, don ku kiyaye ta tsarki” (Fitowa 20:8). Rana ce da Ya tsarkake (Fitowa 20:11). Ta hanyar lura da abin da Allah Ya faɗa game da Ranar Ubangiji, muna samun ƙarfi a makon da ke tafe kuma muna taimakawa yayin da muke kusantar ganin Mai Cetonmu a cikin birni mai tsarki wanda Ubanmu na sama ke shirya mana cikin alheri.

An fara buga wannan labarin a shafin yanar gizon Ministirin Ligonier. [Blog ɗin Ministirin Ligonier]