Wane Alkawari Yesu Ya Bayar Kafin Hawansa Sama?

Alkawari na ƙarshe da Yesu ya ba manzanninsa kafin hawansa zuwa Sama shi ne alkawarin cewa Ruhu Mai Tsarki zai sauko musu don ya ba su ikon kai bishara har iyakar duniya (Ayyukan Manzanni 1:8). Luka ya rubuta cikar wannan alkawari tun daga Ayyukan Manzanni 2, wanda yake ba mu labarin yadda Ruhu ya sauko wa Ikkilisiya a ranar Fentikos.

A ƙarƙashin tsohon alkawari, Fentikos yana ɗaya daga cikin manyan bukukuwan aikin hajji guda uku waɗanda suka bukaci Isra’ilawa su hau zuwa Urushalima (K. Sha 16). Ana kuma kiran sa Bikin Makonni domin ya kasance kwanaki hamsin, ko makonni bakwai, bayan Bikin Ya’yan Fari, or Nunnan Fari, wanda ake kiyaye shi a rana ta farko bayan Asabar na farko a cikin makon Idin Ƙetarewa. Pentikos ya nuna ƙarshen girbin hatsi na lokacin bazara a ƙarƙashin tsohon alkawari (Livit. 23:4–22). Da shigewar lokaci, Yahudawa suka fara danganta Fentikos da ba da shari’a a Dutsen Sinai, mai yiwuwa domin kusan kwanaki hamsin ne suka wuce tsakanin fitowa daga Masar da karɓar dokar (Fit. 19:1).

Yayin da ake shiga sabon alkawari, Ruhu Mai Tsarki ya sauko wa mutanen Allah a ranar Fentikos wadda ta biyo bayan mutuwar da tashin Yesu daga matattu nan take. Ruhu ya zo da karar “iska mai ƙarfi tana kadawa.” Kalmar “ruhu” a duka Hellenanci da Ibraniyanci ita ce kalma ɗaya da ake fassarawa da “iska,” kuma Nassi yana magana game da ikon aikin Ruhu Mai Tsarki a matsayin iska mai ƙarfi ko numfashi (Ezek. 37:1–14; Yahaya 3:8). Tare da karar iskar, harsunan wuta a bayyane suka sauka kuma suka sauka a kan kawunan mutanen (Ayyukan Manzanni 2:3). Wuta ta nuna kasancewar Allah da kuma alkawarin baftisma mai tsarkakewa na Almasihu (Fit. 3:1–6; Luka 3:15–17).

Hakika, Ruhu Mai Tsarki ya kasance tare da al’ummar alkawari kafin ranar Pentikos na sabon alkawari, domin Ya raya mutanen tsohon alkawari kuma ya ba su kyautar bangaskiya. Ya zama dole ya yi hakan domin hanya ɗaya tilo da kowa zai ba da gaskiya ga Allah na gaskiya ɗaya a ƙarƙashin kowane alkawari ita ce ta wurin sake haifuwa ta Ruhu (duba Yahaya 3:3). Duk da haka, ƙwarewar sabon alkawari game da Ruhu ya fi girma nesa ba kusa ba, domin yanzu dukan Kiristoci suna da kyaututtukan Ruhu domin hidima.

Asali, an buga wannan talifi ne a shafin yanar gizon ma’aikatar wallafa littattafai ta Ligonier. [Blog ɗin Ministirin Ligonier]