Magance Laifin Zubar da Ciki

Dubban mutane suna fama da laifin da ke tattare da zubar da ciki. Wannan yana damun abar matan da suka yi su, maza da suka ƙarfafa su, da kuma likitocin da suka gudanar da su. Wata likita ta ba da rahoto a jaridar The New York Times cewa dole ne ta shirya kanta a fannin tunani kuma sau da yawa tana fuskantar rashin barci kafin ta gudanar da zubar da ciki: “Abu ne mai matuƙar wahala ga likitan mata ya yi,” in ji ta. “Abubuwan da yake tayarwa a zuciya suna da ƙarfi sosai . . . har ma likitoci ba sa magana da juna game da shi.” A wani lokaci, wannan likitar ta faɗi a ƙasa, saboda tsananin damuwar zuciya ya rinjaye ta, bayan ta gudanar da zubar da ciki.

Laifin zuciya yana da karfi sosai, kuma yana iya sa mutum ya shiga tsananin damuwa har ya kasa yin abubuwa yadda ya kamata. Wata rana wani likitan kwakwalwa ya tuntuɓe ni da tayin shiga cikin ma’aikatansa. Ya bayyana cewa yawancin marasa lafiyarsa suna fama da matsalolin da suka shafi tsananin laifin zuciya. “Waɗannan mutane ba sa buƙatar likita, suna buƙatar fasto,” in ji shi. “Suna buƙatar wanda zai gaya musu cewa an gafarta musu.”

Wannan likitan kwakwalwa ba Kirista ba ne; amma yana damuwa ne game da lafiyar hankali ta marasa lafiyarsa. Ya fahimci mummunan ikon da laifin da ba a warware ba yake da shi, kuma ya gane cewa musantawa da ba da hujjoji ba hanyoyi ba ne masu kyau na magance laifi na gaskiya. Hanya guda da za ta magance laifi na gaskiya ita ce gafara ta gaskiya. Ƙoƙarin rufe tabon da ke hannunmu bai kai a cire tabon gaba daya ba.

Samun gafarar Allah

Don samun babban ’yanci na gafara, dole ne mutum kawai ya je wurin Allah ya furta zunubi da zuciya mai tawali’u da kuma ruhu mai nadama. Nadama ta gaskiya ta ƙunshi baƙin ciki na gaske saboda rashin biyaya ga Allah. Wannan ya bambamta da nadamar karya, wadda take fitowa saboda tsoron hukunci ko horo. Ana ganin irin wannan tuba a cikin yaro wanda, sa’ad da ya ga sandan horo a hannun mahaifiyarsa, yake baƙin ciki cewa an kama shi da hannunsa a cikin tukunyar biskit. Tuba na gaskiya yana yarda da tabbacin laifin kuma ba ta ƙoƙarin ba da hujja gare shi. Duk wanda ya tuntuɓi Allah da tawali’u na gaskiya, nadama, da kuma ƙuduri na gaske na rashin sake aikata zunubin, lallai zai sami gafarar Allah…

Ko da yake abin da na aikata ba zai taba canzawa ba, zan iya samun gafara. Gafara tana ɗaya daga cikin abubuwan ban al’ajabi na alherin Allah. Ikon warkarwarta yana da ban mamaki. Idan mace ta kasance da hannu a zubar da ciki, Allah ba ya buƙatar ta kwashe sauran rayuwarta tana yawo da alamar kunya kamar jan harafin “A” a ƙirjinta. Yana buƙatar ta tuba daga zunubinta kuma ta zo gare Shi don tsarkakewar gafara. Sa’ad da Allah ya yafe mana, lallai an yafe mana. Sa’ad da Allah ya tsarkake mu, an tsarkake mu. Wannan babban dalili ne na yin murna.

An wallafa wannan talifi ne asali a dandalin Ministirin Ligonier Blog. [Blog ɗin Ministirin Ligonier]