Yaya Za Mu “Amfani da Baftismarmu yadda ya kamata”

Sarauniyar ta taɓa ajiye ɗanta a wani taron bikin ranar haihuwa, sa’an nan ta tunatar da shi: “Ka tuna, yarima: ‘ya’yan sarauta suna da halaye na sarauta.”

Ya zama wajibi a gare mu a matsayin Kiristoci mu yi rayuwa daidai da sunanmu na waɗanda suke cikin firistoci na sarauta, a matsayin ’yan ƙasa na tsarkakacciyar al’umma ta Sarkin Sama (1 Bitrus 2:9). Ana iya kallon baftisma a matsayin wani nau’i na “takardar shaidar haihuwa sabuwa,” wadda ke zama ƙwaƙƙwarar shaida cewa an hatimce mu da ainihin sunan Allah Uku Cikin Ɗaya (Mat. 28:19).

Westminster Larger Catechism ya tambaya, “Yaya za mu kyautata baftismarmu?” (Q&A 167). Don a fayyace, sunan da aka ba mu a cikin baftismarmu ba ya buƙatar kowane irin kyautatawa ko kaɗan, domin cikakke ne kuma gamsasshen sunan Uba, Ɗa, da Ruhu Mai Tsarki. Amma fahimtar mai bi da kuma amfani da ikon ceton wannan sunan na Allah zai iya kuma lallai ne ya girma a duk tsawon rayuwar mutum.

Yaya, fa, za mu amfani da baftismarmu yadda ya kamata?

1. Muna tunawa da kyautar da baftisma take.

Baftisma alama ce da hatimi na alherin da Ubangiji wanda ya tashi daga matattu ya ba wa ikilisiyarsa. Baftisma tana nuna matuƙar “lokacin canji mai girma” ga waɗanda suka karɓe ta. Ta wannan hanyar, tana daidai da abin da Isra’ila ta fuskanta sa’ad da suka haye Jar Teku a kan busasshiyar ƙasa lokacin fitowarsu daga Masar (duba 1 Kor. 10:1-2). Ga mutanen alkawari, manta da ceto daga irin wannan mummunan haɗari abu ne da bai kamata a yi tunaninsa ba. Haka kuma, tunawa da baftismarmu shine fahimtar muhimmancinta: ta wurin bangaskiya, an haɗa mu da Almasihu a cikin mutuwarsa da kuma a cikin tashinsa daga matattu (Rom. 6:1-4). Tunawa da baftismar mutum, fa, hanya ce ɗaya ta samun ƙarfafa ta wurin tabbaci:

Ni ba na kaina ba ne.
Amma ni mallaka ne – jiki da ruhu, ko a cikin rai da mutuwa—
zuwa ga Mai Cetona mai aminci, Yesu Kristi. (Koyarwar Heidelberg 1)

2. Muna ci gaba da furta zunubanmu a gaban Ubangiji.

Augustine ya rubuta, “Shaida addu’ar dukan birnin Allah a yanayinsa na matafiyi, domin yana kira ga Allah ta bakin dukan mambobinsa, ‘Ka yafe mana Laifofin mu, kamar yadda muke yafe wa masu yin mana laifi.’” A matsayin waɗanda aka yi wa baftisma, bai kamata mu yarda da ƙaryar nan cewa ba mu da zunubi ba; maimakon haka, ya kamata mu amince kuma mu furta waɗancan zunubai da tuba a gaban Uba (1 Yahaya 1:8–9).

Sau da yawa akan ga cewa yayin da ana gudanar da ayyukan gida, mutum ba ya gane datti nawa ne wani abu yake da shi sai lokacin share-share ya yi. Haka ne tafiyarmu ta Kirista: sa’ad da muka haska hasken Maganar Allah a kan lunguna da sako na zuciyarmu ne muke ganin yadda ƙazantarmu ta yi zurfi. Kuma yayin da muke tunawa da baftismarmu, haka kuma alkawarin Allah yana ta’azantar da mu yayin da muke fuskantar zurfin zunubanmu: “Amma yana ba da alheri mai-girma” (Yaƙub 4:6).

3. Muna neman mu fahimci ikon tsarkakewa na Allah a cikinmu.

Akwai maganganu da yawa a cikin al’adunmu na yau da kullum game da yiwuwar ƙarancin makamashi da kuma neman ingantattun hanyoyin samar da iko don buƙatunmu na fasaha da sufuri. Amma game da rayuwar Kirista, mu a matsayin tsarkaka muna da kuzarin tashin matattu marar ƙarewa da ƙarfin Kristi da kansa wanda yake aiki a cikinmu (Afis. 1:19–20). Hakika, tunawa da baftismarmu ya kamata ya kai mu ga gaba gaɗi da rashin tsoro a cikin “fafatawa da kyakkyawan yaƙi” (1 Tim. 6:12). Babu wani abokin gaba da za mu iya haɗuwa da shi wanda zai iya fi ƙarfinmu. Wannan ya shafi makiya na gani da marasa gani, na ƙasa da na sama. Ba wai muna kawo gwanintar ƙarfinmu da dabarun yaƙi ba ne, amma Kristi ta wurin Maganarsa (har da a cikin baftismarmu) yana ba mu kwarin gwiwa: “Gama shi kansa ya ce, ‘Ba zan taɓa barinka ba, ba kuwa zan yashe ka ba'” (Ibi. 13:5).

4. Muna tunawa cewa babu wani daga cikinmu da yake tsaye ko yake tafiya shi kaɗai.

Baftisma aikin Allah ne na haɗewa: yana ɗaure mu a matsayin mambobi da yawa zuwa cikin jiki ɗaya (1 Kor. 12:13). Saboda haka, baftisma yana kiranmu mu daraja kyaututtuka da ayyuka dabam-dabam na wasu a cikin ikilisiya, domin kowane sashe yana ba da gudummawa ga kyautatuwa da girman dukan jiki (1 Kor. 12:14–31). A cikin shahararren waƙen Shakespeare, “Dukan Duniya Mataki ne,” ana kallon rayuwar ɗan adam a matsayin wasan kwaikwayo da aka raba zuwa sassa bakwai, kuma a kowane zamani da lokaci, “haka yake taka tasa rawar.” Amma baftisma yana sanya mu cikin matsayi ba na zama tauraro ba amma na yin hidima. Ya kamata mu himmatu wajen “taka rawarmu” don tallafawa da kuma gina juna yayin da muke neman amfanin ikilisiya baki ɗaya, muna ba shi fifiko fiye da buƙatun kanmu. Wannan yana da muhimmanci ga abin da ake nufi da “fara neman mulkin Allah da adalcinsa” (Mat. 6:33). Baftisma tana da manufar kira na hidima a cikin almajirtakarmu, gama Kristi ta cikinta yana kiranmu: “Idan kowa yana son ya biyo ni, sai ya yi musun kansa, ya ɗauki gicciyensa kowace rana, ya bi ni” (Luka 9:23).

An fara wallafa wannan talifi ne a shafin Blog na Ministirin Ligonier. [Blog ɗin Ministirin Ligonier]